Ivan Artamonov

<table class="infobox infobox- " style="" data-name="Военный деятель" itemscope itemtype="http://schema.org/Person">Ivan Iljič Artamonov

Ivan Iljič Artamonov (6. (19.) kylmykuudu vuvvennu 1914 — 16. oraskuudu vuvvennu 1985) on Suuren Ižänmuallizen voinan ozanottai, 1. Valgoven'an frontan 48. armien 399. ammundudiviizien 436. erillizen hävitys-tankoinvastustusdivizionan piälikkö, majouru, Nevvostoliiton urhomies (1944).

Eloskerdu

Oli roinnuhes 6. (19.) kylmykuudu vuvvennu 1914 Tepoiniemen kyläs, nygöi se kuuluu Karjalan tazavallan Anuksen kanzallizen piirin Kotkatjärven kyläkundah, muanruadajien pereheh. Oli karjalaine. Alguškolan loppiettuu ruadoi meččyzavodal. Opastui fuabrikku-zavoduopastuksen školas.

Vuvvennu 1936 Ivan Artamonovua otettih Ruskieh Armieh. Vuvvennu 1939 häi otti ozua bojuloih jovel Halhin-Gol. Loppi nuorien leitenantoin kursit. Vuvvennu 1941 Artamonov liityi Kogo Nevvostoliiton bol'ševiekkoin kommunistizeh partieh.

Artamonov oli Suuren Ižänmuallizen voinan ozanottajannu vuvven 1942 elokuus. Torai Stalingruadan, Br'anskan, Keskus- da 1. Valgoven'an frontil.

Majouran Ivan Artamonovan johtol 436. erilline hävitys-tankoinvastustusdivizionu (1. Valgoven'an frontan 48. armien 399. ammundudiviizii) hyvin ozutti iččie bojulois 3. syvyskuudu vuvvennu 1944 vihollizen puolistuksen katkates da Narev-joves poikki mennes, sit puolistajes Narev-joven päivänlaskurandua.

Narev-jovelluo tulles tankudesantan artilieriijoukko Artamonovan johtol jygielöis ololois, konzu viholline oli flangoil da tagavos, vastusti vihollizen jalguväin da tankoin hyökkävyksii. Guri-, Šl'ahecki- da Pšedevit-kylien lohkol divizionu hävitti kolme tankua, yheksä pulem'outtua, batarei hävitti 75-mm puškua, kolmekymmen seiččie povdodua, kolme motosiklua da kaksi jälgivägirouttua.

Suutkis astittih enämbi 20 kilometrii, Artamonov enzimäzenny huondeksel 4. syvyskuudu vuvvennu 1944 tuli Narev-joven rannalluo, konzu viholline työndi omua tehniekkua da obozoi päivänlaskurannale. Divizionan kiännettyy Ivan Artamonov rubei ambumah poikki mennytty vihollistu, sen periä vihollizet, konzu ei ehtitty suattua jiännyzii voiskii, räjähytettih poikkimenon, а jiännytty joukkuo päivännouzurannal hävitti divizionu yhtes avangardan jalguväinke.

Tämän hyökkävyksen aigah divizionu hävitti joven rannal kuuzi pulem'outtua, bronetrasport'ouran, kolme avtomašinua da enämbän kymmendy vihollizen povozkua. Keskustamattomua ammudua pidäjes se hävitti ammunduvälinehii Narev-joven päivänlaskurannal, mi avvutti jalguväile piästä joves poikki menetyksittäh. Yhtes jalguväin avangardujoukonke Artamonov andoi mahton divizionale piästä päivänalaskurannale, vastusti nelli vihollizen jalguväin kahten bataljonan suuruon vastuhyökkävysty, kudamua kannatettih tankat, hävitti kolme tankua, ičeambui orožu, kaheksa pulem'outtua da vihollizen jalguväin läs kolme vzvodua.

Se hävitti lopukse vihollizen jiännytty vastuhyökkävysty, eistyi edehpäi kuvvele kilometrile da pietti yhtes jalguväin avangardanke otettuu placdarmua piävoiskien tulendassah.

Nevvostoliiton Korgeviman Nevvoston Prezidiuman käskys 18. kylmykuudu vuvvennu 1944 johtokunnan bojutehtävien kunnollizes täyttämizes da urholližuos majouru Ivan Artamonovale annettih Nevvostoliiton urhomiehen arvonimi Leninan kunnivomerkinke da Kuldaine Tiähti -medalinke yhtes (№ 4728).

Jälles voinua Artamonov jatkoi sluužban Ruskies Armies, elokuul vuvvennu 1945 häi rodih artilierienpolkan varapiälikökse 2. Päivännouzufrontal. Vuvvennu 1948 Artamonov loppi Korgien artilierienškolan. Vuvves 1955 podpolkovniekku I. I. Artamonov on eläkkehel. Häi eli Petroskois. Kuoli 16. oraskuudu vuvvennu 1985.

Palkindot da arvonimet

• Nevvostoliiton urhomiehen Kuldaine Tiähti -medali (№ 4728) (18.11.1944);
• Leninan kunnivomerki (18.11.1944);
• Ruskien Flavun kunnivomerki (09.07.1944);
• Ruskien Flavun kunnivomerki (05.11.1954);
• Aleksandr Nevskoin kunnivomerki (26.02.1944);
• Ižänmuallizen voinan I astien kunnivomerki (06.04.1985);
• Ižänmuallizen voinan II astien kunnivomerki (15.09.1943);
• Ruskien Tiähten kunnivomerki (19.11.1951);
• Medali "Rohkevuos" (07.09.1942);
• Medali "Bojuarvoruadolois" (29.08.1939);
• Medali "Bojuarvoruadolois" (05.11.1946)
• Medali "Stalingruadan puolistamizes" (22.12.1942);
• Medali "Germuanien voitandas Suures Ižänmuallizes voinas vuozinnu 1941—1945" (09.05.1945);
• Medali "Königsbergan ottamizes" (09.06.1945);
• Medali "Japounien voitandas" (30.09.1945);
• Karjalan tazavallan kunnivokanzalaine -arvonimi (kuoltuu, vuvvennu 2025).

Pereh

Akkah — Marija Aleksejevna Artamonova.

Musto

• Artamonov on pandu muah Petroskoin Suolusmäin kalmužimale.
• Ivan Artamonovan nimi on annettu Karjalan tazavallan Anuksen kanzallizen piitin Tuuksen školale.
• Ivan Artamonovan kuva, kui kaikkien Karjalan tazavallan Nevvostoliiton uhomiehien nimet da kuvat, on Nevvostoliiton urhomiehien gallereis, kudai avattih vuvvennu 1977 Karjalan tazavallan piälinnas Petroskois Antikazen da Ruskien uuličan lohkol.

Kirjalližus

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — .
• Герои Светского Союза и полные кавалеры ордена Славы : комплект открыток, Ч. 1 / Музей Карельского фронта. — Беломорск : Музей Карельского фронта, [2020]. — 15 отд. л. в обл. : ил. ; 15х10 см

Linkat

•  (Kačondan päivymiäry: 18 kevätkuudu 2011)
• Могила Героя Советского Союза И. И. Артамонова