Meččytulipalot Ven'al (2025)

<table class="infobox infobox- " style="" data-name="Пожар" >Meččytulipalot Ven'al vuvvennu 2025

Meččytulipalot Ven'al vuvvennu 2025 ollah meččymualoin syttymizet Ven’an Federacien alovehel pakkaskuus talvikuussah vuvvennu 2025.

Ennustus

tiedoloin mugah vuvvennu 2025 meččytulipalot voijah algavuo aijemba endisty poikkevuksellizien siäololoin periä. Talvi Federuallizes keskusokrugas ei olluh lumehine, sendäh annettih käsky varustuakseh luonnon tulipaloloih kevätkuun puolivälikse, a ei sulakuun puolivälikse, kui se tavan mugah on. Tulipaloloin syttymine sežo äijäl rippuu ristikanzallizes faktoras.

Aleksei Jarošenko, meččy-, meččytalohuon pyzyvän kehityksen da tulipaloloin azientiedäi projektas ven. «Земля касается каждого»:

Piälimäzet syyt tulipaloloin suures varavos vuvvennu 2025 ollah aigazes keviäs, kudamua ennustetah Ven’an monis meččymua-alovehis da ylen suures kuivuos, kudamua vuotetah muan päivänlaskun ozas. Roinnougo toven kuivus äijäl rippuu sit, vihmaksizetgo roijah kevät da kezä. Ga tänäpäi varmah voibi sanuo, ku mennytvuvven kuivun sygyzyn da ei vähälumehizen talven periä rodih kostežuon vähys muas da lumikatties.

Suurembua tulipaloloin varavuo vuvven 2025 kevätkuus ennustetah läs 30 alovehes Federuallizis Keskus-, Suvi-, Volganrannikon-, Pohjas-Kavkuazan okrugois sego Loittozes Päinännouzus. Varattavinnu ollah Br’anskan, Belgorodan, Moskovan, Voronežan alovehet, Kurskan, Orlovan da Smolenskan alovehen päivännouzu- da keskusozat.

Kevätkuun 14. päivän tiedoloin mugah erilline tulipalovastustuskuri rubei toimimah Ven'an Federacien kolmes subjektas: kaikel Kaliningruadan alovehel, Krasnoduaran alovehen kahtes municipualuyksikös, Primorskoin alovehen 14 municipualuyksikös.

Tulipalon varattavu kauzi avattih Ven'an Federacien kaheksas subjektas: kaikil Krasnoduaran alovehel, Karačajevo-Čerkessien alovehel, Kabardino-Balkuarien, Čečeenien tazavallan, Belgorodan, Astrahanin, Kaliningruadan alovehel, Primorskan alovehen 18 municipualuyksikös.

Tulipaloloin vastustustoimindan finansiiruičendu

Tulipaloloin vastustustoimindah vuvvennu 2025 federuallizes b’udžietaspäi huavatah andua läs 20 miljardua rubl’ua, se on enämbi migu vuvvennu 2024.

Tulipalot alovehis

Amuran aloveh

Keviäl vuvvennu 2025 kaikel alovehel otettih käyttöh erilline tulipalovastustuskuri. Oraskuul tulipalo rodih Amuran alovehen Svobodenskoin piirin mečäs, se terväh levii kovan tuulen da kuivan siän periä. 13. oraskuudu tuli oli ihan Čiolkovskoin linnua lähäl Vostočnii-kosmossukeskuksen alovehel, 14. oraskuudu se sammutettih.

Baikalantagavon aloveh

Sulakuun 7. päivän tiedoloin mugah alovehel oli 32 palajua tulipaluo pindualal enämbi 57 tuhattu gektuarua. Tungokočenskois, Černiševskan da Čitan piirilöis oli Poikevuksellizen tilan kuri.

17. sulakuudu Federuallizen meččytalohuon agenstvu ilmoitti, ku Baikalantagavon alovehel paistah federuallizen tazon Poikevuksellizen tilan kurin käyttöhotandas. Sulakuun tiedoloin mugah Baikalantagavon alovehel oli läs 60 % kaikis meččytulipalolois, kudamii pandih kirjoile Ven’al vuvven 2025 allus.

23. sulakuudu vuvvennu 2025 Baikalantagavos otettih käyttöh federuallizen tazon Poikevuksellizen tilan kuri.

Vuvven 2025 oraskuun 13. päivän tiedoloin mugah Baikalantagavon alovehel oli 45 meččytulipaluo alovehel enämbi 576 tuhattu gektuarua. Vai Čitan municipualuokrugas paloi enämbi 31 tuhattu gektuarua. Ven’an hädätilan ministerstvan pellastajien joukko siirrettih eländypaikkoih Sohondo, Jablonovo da Turgutui, sammutusruadolois oldih Ven’an hädätiloin ministerstvan lendokonehet ven. Ил-76.

21. oraskuudu federualline Baikal-juamu oli salvattu suuren meččytulipalon periä. Tuli levii ihan juamassah, sen periä salvattih nelli kilometrii dorogua Ul’otovskois piiris.

27. oraskuudu meččytulipalo oli lähäl nelliä eländypaikkua: Doroninskoje-, Novotrojick-, Domna- da Bukačača-kylii.

Primorskoi aloveh

Tuhukuun lopul — kevätkuul Primorskan alovehel oldih joukkosyttymizet kuivan vähälumehizen talven periä da ristikanzallizes faktoras. Tulen liviemizeh vaikutti kova tuuli.

Rostovan aloveh

2. sulakuudu Bataiskan luo Suolujärven lähäl rodih muatulipalo, rubei palamah kuivu heiny da korreh. Rodih varavustu linduloin pezoitundale, a suuri savvu levii Rosto-na-Donu -linnassah.

T'umenin aloveh

Sulakuun 1. päiväs alovehel on tulipalon varattavu kauzi. T’umenis piästettih ilmah azetus "оkanzalazien rajoitetus olemizes linnan puustolois paloturvalližuon noudamizekse".

Habarovskan aloveh

10. sulakuudu Ven’an Federacien ekolougien da luonnonvaroin ministru Aleksandr Kozlov pidi istundon Habarovskan alovehen tulipaloturvalližuos, vuvvennu 2024 Habarovskan aloveh puutui Ven’an viijen alovehen joukkoh, kudamat enämbäl kaikki kärzittih tulipalolois, rikottu oli läs 3,3 % meččymuadu.

Hakasii

Tulipaloloi pandih kirjoile tazavallan yheksäs piiris da linnas 19.−20. sulakuudu, sit luvus pandih kirjoile valvondas lähtenyh heinän palandu.

Bur'atii

Vuvven 2025 oraskuun 13. päiväs Bur’aties meččytulipaloloin periä otettih käyttöh alovehellizen tazon Poikevuksellizen tilan kuri. Oraskuun 13. päivän huondeksen tiedoloin mugah alovehel oli 22 meččytulipaluo Bauntovskois evenkoin da Jeravninskois piiris pindualal 53 208 gektuarua.

28. oraskuudu vuvvennu 2025 evakoittih Sulhara-kylän eläjii lähenijän meččytulipalon periä.

Jakuutii

Oraskuun tiedoloin mugah tulen vallas oli läs 20 tuhattu gektuarua.

Jakuuties pietäh koitteluu vihmoin suamizekse. Oraskuul alovehel ruadau kaksi lendokonehtu tegovihmoin suamizekse.

Tiva

Sulakuun puolivälikse Tivan tazavallas vuvven 2025 allus algajen pandih kirjoile 17 meččy- da 17 arotulipaluo. Tulen vallas oli 291,39 gektuarua Sut-Hol'skois, Bai-Taiginskois, Barun-Hemčikskois, Tandinskois, Kaa-Hemskois, Čaa-Hol’skois, Čedi-Hol’skois piirilöis da Kizil-linnas. 10 nämmis tulipalolois oldih viijen kilometrin piäs eländypaikoispäi. Enzimäzien tiedoloin mugah tulipaloloin piäsynny oli rahvahan tulen viäry käytändy. Hädätilan kuri otettih käyttöh Tandinskois piiris suuren meččytulipalon periä. Tulen vallas oli 354 gektuarua eländykohtien Kizil-Arig, Arig-Bažin da Soin lähäl. Tilua pahendau korgei lämbötila päiväl, vihmoin olemattomus da kova tuuli.

Karjalan tazavaldu

Tulipalon varattavu kauzi algavui Karjalan tazavallas suvi- da keskuspiirilöis da piirikunnis 19. sulakuudu (sih kuuluu Kondupohjan piirigi), pohjazis piiris — 25. sulakuudu.

Enzimäinehäi meččytulipalo Karjalas vuvvennu 2025 oli 2. oraskuudu Segežan okrugas Idel'-kylän lähäl. Tuli levii 1,5 gektuarale muadu, syynny oli varattavu tulenkäytändy.

Sortavalan piiris oraskuun 15. päiväs algavui tulipalon varattavu kauzi, sendäh ku ilmu lämbeni da varavuo tulipaloloin roindah liženi. Sortavlan piiris tulipalon varattavu kauzi sai kolmanden tazon (korgevin on viijes). Enzimäine tulipalo piiris sytyi 14. oraskuudu, paloi 6 gektuarua muadu, ammattimiehet läs suutkien aigah sammutettih tulipaluo.

Heinykuun 15. päiväs kogo Karjalan tazavallas on otettu käyttöh erilline tulipalovastustuskuri.

Heinykuun 23. päiväkse sammutettih meččytulipalot Kondupohjan, Onieganrannikon da Louhen piiris, niilöin kogonaine pinduala oli 74,5 gektuarua. Huondeksen heinykuun 24. päivän tiedoloin mugah Karjalas sammutettannu oli vie kolme tulipaluo, kaksi Mujejärven piiris, kolmas Suojärven piirikunnas. Kaikkiedah varattavas tulipalokavves kirjoile pandih 29 meččytulipaluo, niilöin yhtehine pinduala oli 114,96 gektuarua.

28. heinykuudu Mujejärven piiris otettih käyttöh hädätilan kuri, sie on suuri meččytilipalo 125 gektuaral muadu.

Elokuun 8. päiväs kogo Karjalan tazavallas otettih iäre käytöspäi erilline tulipalovastustuskuri, ga tulipalon varattavu kauzi ielleh jiäy.

Tämän kavven aigah Karjalas pandih kirjoile 202 meččytulipaluo, niilöin kogonaine pinduala oli 4753 gektuarua. Meččy äijäl paloi 26- heinykuudu — 11. elokuudu, silloi oli 76 % tulipalolois.

Linkat

• ФБУ "Авиалесоохрана" разработан предварительный прогноз пожарной опасности в лесах России на март-май 2025 года
• Forest Monitoring Designed for Action // Global Forest Watch