Aleksandru Nevskoin kirikkö (Petroskoi)

<table class="infobox infobox- " style="" data-name="Культовое сооружение" >Pravosluavine pyhäkohtuAleksandru Nevskoin kirikkö

45px|link=|Герб России

Ven'an Federacien kanzoin kul'tuuruperindön objektat № 101510210710005

Aleksandru Nevskoin kirikkö (ven. Собор Александра Невского) on pravosluavine kirikkö Petroskoil, Karjalan mitropoulien da Petroskoin jeparhien kirikkö. XIX vuozisuan arhitektuuran mustomerki.

Vuodessah 1929 — Aleksandru Nevskoin zavodan kirikkö.

Histourii

25. sulakuudu vuvvennu 1825 Aleksandrovskoin tykkivalanduzavodan johtokundu sai Kaivos- da suola-azieloin ozastospäi zavodan kirikön nostanduluvan, Novgorodan metropoliittu Serafim (Glagolevskii) blahoslovi uvven kirikön nostamistu.

Kirikön nostanduruadoloin järjestämizekse kerättih toimikundu, kudamua johti Anuksen metallurgiizavodoin johtai Adam Armstrong.

Kaivos-ja suolu-azieloin ozaston arhitektoran Aleksandr Ivanovič Postnikovan (1766—1830) projektu voitti ielpäi ilmoitetus kilvas uvven kirikön nostamizekse. Uvven zavodan kirikön alužimen azettamizen pruazniekkutapahtumu oli heinykuus vuvvennu 1826.

Kirikkö nostettih valdivon denguvaroih sego Aleksandrovskoin zavodan ammattimiehien da virgumiehien lahjudengoih.

Nostanduruadoloi piettih inženieran Pjetro Karlo Madernan johtol vuozinnu 1826—1832. Ikonostuasan azetanduruadoloi johti muasteri A. Bobrov Keksgol’maspäi. Obrazat mualai taidoilii A. S. Čižov. Kirikön kellonjalgoih, suvipuolen nellikulmazes buašn’as, nostettih da riputettih kaheksa eripainostu kelluo.

Anuksen da Petroskoin jepiskoppu Ignuatii (Sem’onov) 27. pakkaskuudu vuvvennu 1832 Ioann Zlatoustan mustelendupäivänny sväti kirikön piäaltarin Pyhän vierolazen suuren kniäzin nimeh. Kirikön bokkuhuonukset svätittih Sroičan da Marlikiiskoin Pyhän čuudoloinluadijan Miikulan nimeh da kunnivokse. Aleksandru Nevskoin zavodan kirikön enzimäzenny papinnu oli Iakov Vasiljevič Vasil’kovskii, teolougien kandiduattu, Piiterin hengellizen akadiemien loppenuh.

Pakkaskuus vuvvennu 1888 pappi Vasilii Nimenskoin varoil kirikön tyveh avattih kirikköškola, Anuksen jeparhien nevvosto zavodan ammatti- da virgumiehien lapsile maksoi abudengua.

Vuvvennu 1929 nevvostovaldu salbai kirikön. Kirikkörakendus annettih käyttöh kodialovehmuzeile, kirikön viizi kupolua riičittih kogonah, sydämes luajittih kerroksien välirakendeh da podvualu muzein ozutteluezinehien varastokse. Muzein enzimäine ozuttelu endizes kirikös avavui vuvvennu 1931.

Kirikön kunnostamine sydämes (vuozi 2019)

Vuvvennu 1991 kirikkö annettih järilleh Petroskoin jeparhiele. Sygyzyl vuvvennu 1993 algavuttih kirikön kohendus- da kunnostusruavot. Uvvistusprojektan valmistai on arhitektoru V. G. Kopnin. Kirikön ulgonaine nägö suadih endizeh kundoh alguperäzen mugah (ainavo poikkevus — kupoloi enne vouse ei kullittu). Kirikön uuzi kunnostamine sydämes (ikonostuasat, kiotat, kuajinduvehkehet da toizet) ei vastua rakenduksen stiilii.

9. oraskuudu vuvvennu 1995 Petroskoin da Karjalan jepiskoppu pidi enzimäzen pruazniekkusluužban. Heinykuus vuvvennu 1996 kiriköle azetettih pravosluavizet ristat.

3. kezäkuudu vuvvennu 2000 Moskovan da Kogo Ven'an patriarhu Aleksii II sväti kirikön, se rodih Petroskoin da Karjalan jeparhien kirikökse. Petroskoin da Karjalan metropoliittu Konstatin (silloine Tihvinän arhijepiskoppu, Piiterin hengellizen akademien rektoru) otti ozua kirikön svätindypidoh.

Heinykuus vuvvennu 2000 kodialovehmuzeispäi kiriköle annettih prepodobnoin Antonii Riimalazen, Paraskeva Piätteniččän pyhien jiännöksien palazet da pappi Aaronan savakon pala.

Kirikön piha-aijan sydämes on mustopliittu Karjalas arvostetun pyhän Feddei Blažennoin kalmalpäi. Pienes puustos (zavodan lagevo) ollah azetettu mustomerkit — Černobil’an kärzinyzile da Armienien diasporan lahju Petroskoin linnale sen 300-vuozipäivän kunnivokse.

3. kezäkuudu vuvvennu 2010 Karjalan tazavallan 90-merkivuvvennu kirikön lähäl avattih Pyhän kniäzin Aleksandru Nevskoin mustopačas (kuvanvestäi V. G. Kozen’uk). Sinypiängi sen sväti Moskovan da Kogo Ven'an patriarhu Aleksii II.

Kirikköh kuulujat pyhäkohtat da časounat

• Časounu Jumalan Ristan nimeh — Golikovka-čupul. On murendettu vuvven 1917 jälgeh;
• Časounu Pyhän Jyrrin nimeh — Golikovka-čupul. Nosti sen vahnan puučasounan sijale vuvvennu 1891 petroskolaine torgumies Mihail Pavlovič Koritov imperuttoran Aleksandru II:n hengen pellastamizen kunnivokse vuvvennu 1888. On murendettu vuvven 1917 jälgeh;
• Časounu Jumalan Ristan nimeh T’urman uuličal. On murendettu vuvven 1917 jälgeh;
• Časounu Pyhien apostoloin Pedrun da Puavilan nimeh Viitegran piätiel. On nostettu vuvvennu 1998 arhitektoran projektan mugah;
• Časounu Jumaldoman Ahtirskoin obrazan nimeh Tazavallan bol’ničalluo. Svätitty vuvvennu 2000;
• Časounu Pyhän Blažennoin Piiterin Ksenien nimeh Tazavallan perinatualukeskukses Petroskoil. Svätitty vuvvennu 2001.

• 
  Feddei Blažennoin kalman mustopliittu
• 
  Prihodan časounu pyhien apostoloin Pedrun da Puavilan nimeh
• 
  Černobil’an kärzinyzien mustomerki kirikön pienes puustos
• 
  Armienien diasporan lahju (mustomerki) linnale sen 300-vuozipäivän kunnivokse, on azetettu kirikön pieneh puustoh

Kirjalližus

• Соборы Петрозаводска. — Петрозаводск, 1999. — .
• Александра Невского церковь // Север (журнал). — 1998. — № № 8. — С. 125—129.
• Александро-Невский собор // Олонецкая епархия. Страницы истории. — 2000.
• Петрозаводск. // Путеводитель по православным святыням Карелии / Под ред. О. И. Сидловской. — Петрозаводск, 2003.
• Карелия: энциклопедия: в 3 т. — Петрозаводск: "ПетроПресс", 2011. — Т. Т. 3: Р — Я. — С. 104—105. — 384 с. — .

Linkat

• Собор во имя св. блгв. кн. Александра Невского
• Собор во имя св. блгв. кн. Александра Невского на портале епархии
• Собор во имя св. блгв. кн. Александра Невского