Ole Einar Bjorndalen

<table class="infobox infobox- " style="" data-name="Persounu" >

Ole Einar Bjorndalen (ven. У́ле-Эйнар Бьёрнда́лен; norv. Ole Einar Bjørndalen; ) on norviegielaine hiihtoambui, Olimpiuadukižoin, Muailman kilvoin da Muailman sportumal’l’an kilboin histouries kaikis enimäl arvonimie suannuh (vuvvekse 2023) . Olimpiuadukižois Bjorndalen sai 13 medalii, niilöin luvus kaheksa kuldumedalii, Muailman kilvois sai 20 kuldumedalii da kuuzi kerdua oli Muailman sportumal’l’an omistai. Vuvven 2002 Olimpiuadukižois Solt Leik Sitis Bjorndalen rodih voittajakse kaikes nelläs hiihtoammundan lajis da rodih ainavokse muailmas ehtottomakse Olimpiuadukižoin čempionakse hiihtoammundas. Bjorndalen iče oli 96 kerdua voittajannu hiihtoambujien da hiihtäjien kilvois Muailman sportumal’l’an suamizekse (95 hiihtoammundas da kerran hiihtändäs). Kaikkiedah niilöis hänel on 133 voittuo, sih luguh kuulutah sežo voitot joukkovehlajilois.

Vuozinnu 2014—2016 Bjorndalen kuului Kanzoinvälizeh Olimpiuadukomitiettah.

Bjorndalen on hiihtoammundas ijäkkähin Muailman sportumal’l’an kilboin da Olimpiuadukižoin voittai (hänel oli 41 vuottu, 10 kuudu da 5 päiviä).

Eloskerdu

Bjorndalen on roinnuhes Norviegien Drammen-linnah fermeroin pereheh. Opastundu ei ylen äijiä kiinnostannuh händy, enin aigua häi vietti sportukerholois. Kižai jalgumiäččyh, kävyi käzimiäčyn harjaitteluloih, lykii keijästy, yhtyi pyörysportan da ulgoatletiekan (3000 metrin juoksu) kilboih. Hänen tuattah sežo harjaitti ulgoatletiekkua, ga hänel pidi jättiä sportu piän elättämizekse. Bjorndalenal on kaksi vellie da kaksi sizärdy. Vahnin velli Dag enzimäzenny perehes rubei harjaittamah hiihtoammundua, hänen jälgilöile sit lähti Ole Einar.

Vuvvennu 2006 oraskuun 27. päivänny Bjorndalen nai belgieläzes (itualielastu juurdu olii) hiihtoambujas Natali Santeras. Lastu heil ei olluh. Ligakuul 2012 oli ilmoitettu, ku Natali da Ole Einar erotah jälles kuuttu vuottu yhtehmendyy.

Vuvvennu 2016 kezäkuun 16. päivänny Bjorndalen nai valgoven’alazes hiihtoambujas Darja Domračevas. Heile rodih tytär 1. ligakuudu vuvvennu 2016 Minskas, kudamale annettih nimi Ksenija. Jälles vuvvennu 2023 pereh rodih vie yksi tytär, hänele annettih Mira-nimi. Vuvven 2023 tiedoloin mugah molodoit eletäh kolmes muas, enimilleh Monakos, vie Norviegies da Valgoven'al; Bjorndalen ruadau eksperstannu TV:s da kävyy Muailman kubkan kilboih, pereh äijän matkustelou.

Harjaittelijan ruado

Syvyskuul vuvvennu 2019 rodih Kitain joukkovehen piäharjattelijakse, a akkah Darja Domračeva naizien joukkovehen johtajakse. Vuvennu 2022 yhtehine ruado Kitainke loppih.

Persounallistu tieduo

• Bjorndalen maltau norviegien, anglien, germuanien, itualien da ven’an kielii;
• Vuvves 1984 harjaittau hiihtoammundua;
• Vuvves 1992 kuuluu Norviegien joukkoveheh;
• Hänen harjaittelijat — Rogger Grubben da Joar Himmle.

Mieldykiinittäjiä tieduo

Bjorndalen sissäh pidäy huoldu puhtahuos da omas tervehyös, sendäh keräl ainos ottau pölynimurin da harvah konzu andau kätty tervehtijes. Häi sanoi, ku pölynimurinke ajelendu ei olluh hänen idei, häi rubei ruadamah sidä joukkovehen ystävien peräh.

Palkindot

• 1998 — Aftenposten-lehten kuldumedali;
• 2002 — Egebergs-palkindon laureattu.;
• 2009 — Fair play -palkindon laureattu;
• 2011 — Holmenkollenan medali (Norviegien suurin palkindo hiihtäjile suures panokses sportah da korgielois tuloksis);
• 2014 — Kanzallizien olimpiuadukomitiettoin liiton palkindon laureattu,
• 2023 — Bjorndalenan nimi on ezitetty Kanzoinvälizen hiihtoambujien liiton Kuulužuon zualas.